Viongozi wakutana kujadili makubaliano ya nyuklia ya Iran

Viongozi wakutana kujadili makubaliano ya nyuklia ya Iran

Mawaziri wa mambo ya nchi za nje kutoka mataifa matano makubwa duniani wanakutana mjini Vienna, Austria wakipania kuitanabahisha Iran isijitoe katika makubaliano ya nyuklia ya mwaka 2015.

Shirika la habari la ABNA linaripoti kuwa: Mawaziri wa mambo ya nchi za nje kutoka mataifa matano makubwa duniani wanakutana mjini Vienna, Austria wakipania kuitanabahisha Iran isijitoe katika makubaliano ya nyuklia ya mwaka 2015.

Mawaziri wa mambo ya nchi za nje kutoka mataifa matano makubwa wanakutana na mwenzao wa Iran mjini Vienna kwa lengo la kusaka njia za kuyanusuru makubaliano yaliyofikiwa mwaka 2015 pamoja na Tehran baada ya Marekani kujitoa.

Mkutano wa leo kati ya Iran, Ujerumani, Uingereza, Ufaransa, Urusi na China utazingatia mapendekezo ya kuyanusuru makubaliano hayo yanayojulikana kwa jina "Mpango wa  Mkakati wa Pamoja" - uliolengwa kuizuwia Iran isitengeneze silaha za nyuklia.

Mwezi Mei, Rais Donald Trump wa Marekani alibatilisha makubalianao hayo yaliyofikiwa na mtangulizi wake, akihoji hayatoshi na hayazingatii hofu za Marekani na washirika wake ikiwa ni pamoja na ushawishi wa kijeshi wa Iran katika eneo la Mashariki ya Kati na mradi wa Iran wa kutengeneza makombora ya masafa marefu.

Iran inatishia pia kujitoa katika makubaliano hayo kama hayatakuwa na faida

Rais Hassan Rohani wa Iran alisema mapema wiki hii angependelea kuyanusuru makubaliano  licha ya kujitoa Marekani, ikiwa lakini mataifa matano makubwa yaliyosalia yanaweza kutoa hakikisho kwamba Iran haitajikuta ikitengwa kiuchumi kutokana na vikwazo ambavyo Marekani imeamua kuvifufua.

Waziri wa Mambo ya Nchi za Nje wa Urusi Sergei Lavrov amesema nchi yake pamoja na China wanapendelea kuona makubaliano yaliyofikiwa pamoja na Iran yananusurika. Kwa mujibu wa shirika la habari la RIA, Waziri Lavrov amesema hayo baada ya mazungumzo yake pamoja na mwenzake wa China, Wang Yi, mjini Vienna.

Duru zaidi za mazungumzo zitahitajika

Ufaransa kwa upande wake inahisi mataifa ya Magharibi hayatoweza kutoa mapendekezo ya kiuchumi kuunusuru mradi wa nyuklia wa Iran kabla ya Novemba inayokuja. Hayo yametangazwa na Waziri wa Mambo ya Nchi za Nje wa Ufaransa Jean-Yves Le Drian mbele ya maripota wa kituo cha matangazo cha RTL, kabla ya kuelekea Vienna.

Hoja kama hizo zimetolewa pia na Waziri wa Mambo ya Nchi za Nje wa Ujerumani Heiko Maas. Akizungumza na waandishi habari kabla ya mazungumzo pamoja na mawaziri wenzake mjini Vienna, Heiko Maas amesema "hawatoweza kufidia kila kitu kitakachoathirika kwa kujitoa makampuni nchini Iran." Anasema haamini kama maridhiano yanaweza kufikiwa leo na kwamba pengine duru zaidi za mazungumzo zitahitajika.

Mwisho wa habari / 291

 

 


Taarifa zinazohusiana

Tuma maoni

Email yako haiwezi kutuma, tafadhali chunguza Email yako

*

Ujumbe wa Kiongozi Muadhamu wa Mapinduzi ya Kiislamu kwa mahujaji
We are All Zakzaky