Mkuu wa Walinzi wa Mapinduzi: Mujahidina wa Kiislamu Walililazimisha Jeshi Lenye Silaha Nyingi Zaidi Duniani kunyenyekea (kusalimu amri)

Shirika la Habari la Kimataifa la Ahlul-Bayt (as) - ABNA- Mkuu wa Walinzi wa Mapinduzi ya Kiislamu, Meja Jenerali Ahmad Vahidi, amewapongeza wapiganaji wa Kiislamu kwa miezi sita ya mapambano na kujitolea, akisisitiza kuwa waliweza kulilazimisha jeshi lenye silaha nyingi zaidi duniani kusalimu amri.

Katika ujumbe wake kwa wapiganaji hao, Vahidi amesema mafanikio hayo yametokana na kumtegemea Mwenyezi Mungu na mapambano yao katika mazingira magumu sana.

Ameeleza kuwa wapiganaji hao walifanya kazi katika mazingira yenye changamoto kubwa, kuanzia joto kali na unyevunyevu mkubwa katika visiwa na maeneo ya pwani ya kusini mwa nchi, hadi baridi kali ya maeneo ya milimani yaliyo kwenye mipaka ya kaskazini mwa nchi.

Vahidi amesema pamoja na mazingira hayo magumu, wapiganaji hao walitekeleza kwa mafanikio operesheni za mashambulizi na ulinzi huku wakikabiliwa na mashambulizi makubwa ya moto.

Kwa mujibu wa ujumbe huo, miezi sita ya mapambano yao imeonyesha kiwango kikubwa cha ujasiri, uthabiti na kujitolea.

Vahidi amesema ukuu na uthabiti ulioonyeshwa na wapiganaji hao katika kipindi hicho cha mapambano makali dhidi ya maadui wakali zaidi wa ubinadamu umevutia dunia nzima.

Ameongeza kuwa kujitolea kwao kumehuisha matumaini katika nyoyo za watu wanaodhulumiwa kwamba ushindi wa mwisho dhidi ya wenye kiburi na madhalimu unawezekana.

Vahidi amesisitiza kuwa imani kwa Mwenyezi Mungu, uvumilivu na kusimama imara katika mazingira magumu ni miongoni mwa mambo yaliyowawezesha wapiganaji hao kufanikisha majukumu yao.