Katika mahojiano na gazeti moja la Umoja wa Falme za Kiarabu, Papa Francis amesema ameghadhabishwa na kukerwa na hatua ya kuvunjiwa heshima Qur'ani Tukufu huko nchini Sweden.
Papa Francis ametilia mkazo suala la wafuasi wa dini mbalimbali kuishi pamoja kwa amani na maelewano, sanjari na kupinga misimamo na mitazamo ya kufurutu mipaka.
Kiongozi wa Kanisa Katoliki duniani amesema kuwa, uhuru wa maoni na kujieleza haipasi kuonekana kama idhini ya kitendo hicho cha fedheha cha kuvunjia heshima matukufu ya dini nyingine.
Papa Francis ameeleza bayana kuwa, kutumia 'uhuru wa maoni' kuonyesha dharau na chuki kwa wengine kunapasa kupingwa kwa nguvu zote na kulaaniwa vikali.
Waislamu kote duniani wamepaza sauti zao kulalamikia kitendo hicho kiovu cha kudhalilisha na kuvunjiwa heshima Qurani Tukufu nchini Sweden, huku kampeni kubwa ya dunia nzima ya kususia bidhaa zinazozalishwa na nchi hiyo ya Magharibi ikishika kasi.
342/