Kikao cha Baraza la Usalama kilifanyika kwa ombi la Russia Jumanne alasiri kujadili uchokozi hatari wa Israeli kwenye sehemu ya Ubalozi wa Iran katika kitongoji cha Mezzeh huko Damascus mnamo Aprili 1.
Ndege za kivita za Israel zilishambulia jengo la kidiplomasia la Iran na kuua washauri saba wa kijeshi wa Jeshi la Walinzi wa Mapinduzi ya Kiislamu (IRGC).
Brigedia Jenerali Mohammad Reza Zahedi, kamanda wa ngazi za juu wa Kikosi cha Quds cha IRGC, na naibu wake Jenerali Mohammad Hadi Haji Rahimi walikuwa miongoni mwa mashahidi wa shambulio hilo la kigaidi.
Akihutubia Baraza la Usalama, Vassily Nebenzia, balozi wa Russia katika Umoja wa Mataifa, ameilaani mashambulizi ya mara kwa mara ya Israel ya makombora na mabomu yanayolenga Syria. Amesema mashambulizi ya Israel dhidi ya jingo la ubalozi wa Iran nchini Syria ni ukiukwaji wa wazi wa mikataba ya Vienna.
Mwakilishi wa China amelaani mashambulizi ya anga ya Israel katika majengo ya kidiplomasia ya Iran nchini Syria na kuyataja kuwa ni "ukiukaji mkubwa wa Mkataba wa Umoja wa Mataifa na sheria za kimataifa" na "ukiukaji wa mamlaka ya kujitawala Syria na Iran."
Mwakilishi wa Algeria alisema ukiukaji mkubwa kama huu wa kanuni za kimataifa wa utawala wa Israel hauwezi kuhalalishwa au kuvumiliwa, akionya kwamba hii inaweza kusababisha kuongezeka kwa mvutano na madhara makubwa zaidi ya kikanda.
Mwakilishi wa Uswizi katika Umoja wa Mataifa alilaani shambulizi hilo la anga dhidi ya ubalozi mdogo wa Iran mjini Damascus, akisema kwamba ongezeko hilo la uchokozi lazima likome mara moja.
Mwakilishi wa Ecuador alilaani mashambulizi yote yaliyofanywa dhidi ya balozi na wawakilishi wa kidiplomasia na kibalozi.
Katibu Mkuu wa Umoja wa Mataifa naye pia awali alikuwa ametoa tamko la kulaani shambulizi hilo la utawala wa Kizayuni wa Israel dhidi ya sehemu ya ubalozi mdogo wa Iran mjini Damascus, Syria na kuonya kwamba mahesabu yoyote ya kimakosa yanaweza kusababisha mapigano yenye wigo mpana zaidi katika eneo hili tete na lisilo na utulivu na kusababisha matokeo haribifu kwa raia.