Katika mazungumzo ya simu na mwenzake wa Misri, Badr Abdelatty, yaliyofanyika Jumatano usiku, Waziri wa Mambo ya Nje wa Iran Abbas Araghchi amesisitiza kuwa kukomeshwa kwa uhalifu wa Israel pamoja na kutekelezwa kwa usitishaji mapigano Gaza ni hatua muhimu katika kutatua migogoro mingine ya eneo hilo.
Mawaziri hao wawili wameonesha wasiwasi mkubwa kuhusu kuongezeka kwa mashambulizi ya Israel katika eneo hilo, ambapo Gaza, Lebanon, Syria na Yemen zinakumbwa na uvamizi wa kila siku. Pia wamesisitiza umuhimu wa kuimarisha juhudi za kidiplomasia ili kupunguza mivutano na kuzuia mgogoro mkubwa zaidi katika eneo la Asia ya Magharibi.
Abdelatty na Araghchi walibadilishana pia maoni kuhusu mazungumzo yasiyo ya moja kwa moja kati ya Iran na Marekani yanayotarajiwa kufanyika Jumamosi katika mji mkuu wa Oman, Muscat.
Israel ilianza tena mashambulizi yake ya kinyama dhidi ya Gaza Machi 18 baada ya usitishaji mapigano wa miezi miwili, na kutuma tena wanajeshi katika eneo hilo la Wapalestina linalozingirwa. Kwa mujibu wa wizara ya afya ya Gaza, takriban Wapalestina 1,500 wameuawa na mashambulizi ya jeshi la Israel ndani ya kipindi cha wiki tatu zilizopita.
Tangu mwishoni mwa Machi, Israel imekuwa ikiwaamuru wakaazi wa Gaza kuhama maeneo ya pembezoni mwa ukanda huo ili kuanzisha kile inachokiita "eneo la usalama"; wakaazi wana hofu kwamba lengo halisi ni kufuta kabisa uwepo wa Wapalestina katika maeneo hayo.
Waziri Mkuu wa utawala haramu wa Israel, Benjamin Netanyahu, ameahidi kuongeza mashambulizi kama sehemu ya mpango mpana unaoendana na pendekezo la Rais wa zamani wa Marekani, Donald Trump, la kuhamisha kwa nguvu Wapalestina kutoka Gaza.
Katika taarifa yake siku ya Jumatano, wizara ya afya ya Gaza ilionya kuwa takriban watoto 60,000 wanakabiliwa na utapiamlo mkali na matatizo mengine ya kiafya yanayohusiana na hali hiyo.
342/
Your Comment