Iran yalaumu mataifa ya magharibi kwa uchochezi

Waziri  wa  mambo  ya  kigeni  wa  Iran, Mohammed Javad Zarif, ameyashutumu  mataifa  ya  magharibi  wa  kuchochea  itikadi  kali za  Kiislamu  kwa  kushindwa  kulinda  haki  za  Waislamu  wahamiaji. 

 Mohammad Javad Zarif  ameliambia  baraza  la  haki  za  binadamu la  Umoja  wa  mataifa  lenye  makao  yake  makuu  mjini  Geneva leo  kuwa  idadi  kubwa  ya  wale  wanaojiunga  na  kundi  la kigaidi la Daesh linalojiita  Dola  la Kiislamu  na  mengine ni raia wa mataifa  ya  kidemokrasia  ya  magharibi.

Amedokeza  kwamba  baadhi  ya  wale , ambao  wanawachinja  raia wasio  na  hatia  wanazungumza  lugha  za  mataifa  ya  Ulaya  kwa ufasaha na  lafudhi ya  jamii  ya  mataifa  hayo, akimlenga  "Jihadi John"   ambaye  ameonekana   katika  video  kadhaa  za  kundi  la kigaidi la Daesh za  propaganda  zinazoonesha  kuuwawa  kwa  wafungwa  wa kundi  hilo.

Jihadi John  ametambulika  wiki  iliyopita  kuwa  ni  Muhammed Emwazi, kijana  aliyekulia  mjini  London. Zarif pia  amerudia  dai  la nchi  yake  la  hapo  kabla  kwamba  juhudi  za  mataifa  ya  Ulaya kuhimiza  haki  za  binadamu  katika  mashariki  ya  kati zimevuruga tawala  zilizopo na  kuyanufaisha  makundi  ya  itikadi  kali.