Umoja wa mataifa walaani unyama unaofanywa na Daesh

Baraza  la  Usalama  la  Umoja  wa  Mataifa  jana  limeshutumu kile ilichokieleza  kuwa  ni vitendo  vya kinyama  vya  kigaidi  nchini  Iraq vinavyofanywa  na  wanamgambo  wa kundi la kigaidi la Daesh, ikiwa  ni pamoja  na  kuharibu  sanaa  za  kidini  na  za  utamaduni. Video iliyotolewa  na  kundi  hilo la  itikadi  kali  la  magaidi wa Daesh siku ya  Alhamis  zinaonesha  watu  wakivunja sanamu  la  kale  la Assiria  na  masanamu  mengine  ya  kuchonga , baadhi  yake  ni  ya karne  ya  7  kabla  ya   kuzaliwa  Yesu, kwa  nyundo  na  mashine za  kutobolea, wakisema  ni  vitu vya ushirikina.Baraza  la  Usalama limesema  katika  taarifa  kuwa  limeshutumu  vikali  unyama  huo unaoendelea  nchini  Iraq unaofanywa  na  kundi la kigaidi la Daesh.

Wakati huo huo kundi  la  maseneta  wa vyama vya  Democratic  na  Republican nchini  Marekani  wamewasilisha sheria jana  ambayo  itahitaji kupitiwa  na  baraza  la  Congress iwapo makubaliano  yoyote ambayo  utawala  wa  rais Obama  na  mataifa mengine  yenye nguvu  duniani  yatafikiwa  na  Iran kuhusiana  na  mpango  wake  wa kinyuklia. Hatua  hiyo inataka  kwamba  rais Barack Obama awasilishe  waraka  wa  makubaliano  yoyote  kwa  bunge  na unaizuwia  serikali  hiyo  kusitisha  vikwazo  vya  bunge  la  Marekani dhidi  ya  Iran kwa  siku  60. Katika  wakati  huo , bunge  litasikiliza na  kupata  fursa  ya  kuidhinisha , ama  kukataa  ama  kutochukua hatua  yoyote  katika  makubaliano  hayo.Sheria  hiyo  ni changamoto  mpya  kwa  mamlaka  ya  rais Obama  wakati Marekani  na  mataifa  mengine  yanazungumza  na  Jamhuri ya kiislamu Iran  kuhusiana na  uwezo  wake  wa  kinyuklia.  Huenda  lakini  ikalazimu  rais Obama  kutumia  uwezo  wake  wa  kura  ya  turufu.