Hakuna matumaini ya kufikia muafaka wa amani ya Libya

Mjumbe wa Umoja wa Mataifa kuhusu Libya Bernardino Leon ameonya hii leo kuwa  pande mbili zinazozana nchini Libya ziko mbali kufikia makubaliano ya kuutafutia ufumbuzi mgogoro wa kisiasa huku duru nyingine ya mazungumzo ya kuzikutanisha pande hizo ikianza jana nchini Morocco. Leon amesema kufikiwa kwa makubaliano itakuwa kibarua kigumu na bado safari ni ndefu ya kukubaliana namna ya kuunda serikali ya muungano wa kitaifa. Huku mazungumzo hayo ya siku tatu yanayosimamiwa na Umoja wa Mataifa yakiendelea Morocco, serikali ya Libya inayotambulika na jumuiya ya kimataifa imesema imeanzisha mashambulizi ya kijeshi ya anga ya kuukomboa mji mkuu Tripoli uliotekwa na waasi mwaka jana.