Makala hiyo ya Rais Sayyid Ebrahim Raisi wa Iran chini ya anwani "Marafiki wa zamani ni washirika bora kwa ajili ya mustakbali mwema" ilichapishwa katika toleo la jana Jumatatu la gazeti la People's Daily la China kabla ya kuanza ziara rasmi ya Rais wa Iran huko Beijing leo Jumanne.
Rais Raisi ameandika katika makala yake hiyo kwamba: Serikali za Iran na China ambazo zimechagua Mpango wa Ushirikiano wa Pamoja wa Kimkakati kama kigezo cha mahusiano endelevu kati ya pande mbili, zina masuala mbalimbali ya pamoja na yale yenye kushabihiana kuhhusu matukio ya kimataifa.
Rais Ebrahim Raisi ameandika kuwa, nchi mbili za Iran na China zinapinga hatua za kujitanua na za kujichukulia maamuzi ya upande mmoja na kusisitiza ulazima wa kuheshimiwa haki na maslahi ya nchi zote.
Makala ya Rais wa Iran katika gazeti la People's Daily la China imeendelea kueleza kuwa: Jamhuri ya Kiislamu ya Iran inapinga misimamo ya kuchupa mipaka na ugaidi kwa mujibu wa misingi ya Uislamu na kuheshimu dini na tamaduni zote; na inatambua hayo kuwa ni kinyume na Uislamu sahihi na saada ya mwanadamu. Rais Raisi amesisitiza kuwa, Jamhuri ya Kiislamu ya Iran inataka kuwa na uhusiano mzuri na nchi zote duniani hususan mataifa rafiki kama China.
342/
