Kwa mujibu wa Shirika la Habari la Kimataifa la Ahlul-Bayt (as) –ABNA– Katika mtazamo wa Qur’ani Tukufu na mafundisho ya Mtume Muhammad (saww), nafasi na utukufu wa watu hutathminiwa kwa vigezo vya kimungu, badala ya vipimo vya kawaida vya kibinadamu. Katika muktadha huo, Hazrat Fatima Zahra (SA) ana nafasi ya kipekee katika historia na mafundisho ya Uislamu, huku Aya mbalimbali za Qur’ani na riwaya zikibainisha utukufu na daraja lake la kiroho.
Makala hii inafafanua baadhi ya dalili muhimu za Qur’ani na Hadithi zinazobainisha nafasi hiyo ya kipekee.
1. Aya ya Utakasifu: Dhihirisho la usafi na utakatifu wa Ahlul-Bayt (as)
Miongoni mwa aya muhimu zinazobainisha daraja la Hazrat Fatima Zahra (SA) ni Aya ya 33 ya Surat Al-Ahzab, inayojulikana kama Aya ya Utakasifu (Ayat al-Tat’hir):
“Hakika Mwenyezi Mungu anataka kukuondoleeni uchafu, enyi Watu wa Nyumba, na kukutakaseni kwa utakaso kamili.”
Kwa mujibu wa riwaya zilizotajwa katika vyanzo vya Kiislamu vya Kishia na Kisunni, aya hii inahusishwa na watu watano wa Ahlul-Kisaa: Mtume Muhammad (saww), Imam Ali (as), Hazrat Fatima Zahra (SA), Imam Hassan (as) na Imam Hussein (as).
Makala hiyo inanukuu maelezo ya Allamah Tabataba’i katika tafsiri ya Al-Mizan, akieleza kuwa Mtume (saww) aliwakusanya watu hao chini ya joho lake na kumuomba Mwenyezi Mungu awaondolee uchafu na kuwatakasa.
2. Aya ya Mubahala: Nafasi ya Hazrat Fatima (SA) katika kuthibitisha haki
Aya ya 61 ya Surat Aal-Imran, inayojulikana kama Aya ya Mubahala, ni miongoni mwa ushahidi mwingine wa nafasi ya Hazrat Fatima Zahra (SA).
Katika tukio la Mubahala kati ya Mtume Muhammad (saww) na Wakristo wa Najran, Mtume aliambatana na Imam Hassan (as), Imam Hussein (as), Hazrat Fatima Zahra (SA) na Imam Ali (as).
Kwa mujibu wa makala hiyo, Hazrat Fatima (SA) alikuwa ndiye aliyemwakilisha mwanamke katika tamko la Qur’ani la “Nisaa’anaa” (wanawake wetu), jambo linaloonesha nafasi yake ya pekee katika tukio hilo muhimu la kuthibitisha ukweli wa ujumbe wa Mtume.
3. Aya ya Upendo kwa Ahlul-Bayt (as): Malipo ya Utume
Aya ya 23 ya Surat Ash-Shura inasema:
“Sema: Sikuombeni malipo yoyote juu ya haya isipokuwa kuwapenda ndugu wa karibu.”
Kwa mujibu wa riwaya zilizotajwa katika makala hiyo, Mtume Muhammad (saww) alipoulizwa kuhusu ndugu wa karibu wanaokusudiwa katika aya hiyo, alitaja Imam Ali (as), Hazrat Fatima Zahra (SA) na watoto wao wawili, Imam Hassan (as) na Imam Hussein (as).
Hivyo, upendo kwa Ahlul-Bayt (as) unaelezwa kuwa ni sehemu muhimu ya mafundisho ya Utume na njia ya kuwaongoza waumini katika kumtii Mwenyezi Mungu.
4. Radhi ya Fatima (SA) ni radhi ya Mwenyezi Mungu
Miongoni mwa Hadithi mashuhuri zinazobainisha utukufu wa Hazrat Fatima Zahra (SA) ni kauli ya Mtume Muhammad (saww):
“Hakika Mwenyezi Mungu hukasirika kwa kukasirika kwako na huridhika kwa kuridhika kwako.”
Hadithi hii imenukuliwa katika vyanzo mbalimbali vya Kishia na Kisunni, vikiwemo Al-Mustadrak ‘ala al-Sahihayn cha Hakim Nishapuri na Al-Mu‘jam al-Kabir cha Tabarani.
Kwa mujibu wa maelezo ya makala hiyo, Hadithi hii inabainisha daraja ya juu ya kiroho ya Hazrat Fatima (SA), pamoja na uhusiano wa karibu kati ya radhi yake na radhi ya Mwenyezi Mungu.
5. Mus-haf Fatima: Hazina ya maarifa ya kimungu
Makala hiyo pia inazungumzia Mus-haf Fatima, ambao ni miongoni mwa masuala muhimu yanayotajwa katika riwaya zinazohusu utukufu wake.
Kwa mujibu wa riwaya zilizotajwa katika kitabu Al-Kafi, baada ya kufariki dunia kwa Mtume Muhammad (saww), Malaika Jibril (as) alikuwa akimshukia Hazrat Fatima (SA) ili kumfariji kutokana na msiba wa baba yake na kumweleza baadhi ya matukio ya baadaye. Imam Ali (as) alikuwa akiandika maelezo hayo.
Inasisitizwa kuwa Mus-haf Fatima si Qur’ani Tukufu, bali ni mkusanyiko wa maarifa na taarifa za kimungu, ambao unatajwa kuwa miongoni mwa vyanzo vya maarifa vya Maimamu wa Ahlul-Bayt (as).
Hitimisho
Kwa mujibu wa ushahidi wa Qur’ani Tukufu na riwaya zilizojadiliwa katika makala hii, nafasi ya Hazrat Fatima Zahra (SA) haiishii katika kuwa binti wa Mtume Muhammad (saww), bali inajumuisha daraja kubwa la kiroho na nafasi muhimu katika mafundisho ya Uislamu.
Kupitia Aya ya Utakasifu, Aya ya Mubahala, Aya ya Upendo kwa Ahlul-Bayt (as), Hadithi kuhusu radhi yake na riwaya zinazohusu Mus-haf Fatima, makala hii inabainisha namna utukufu wake unavyodhihirishwa katika vyanzo vya Kiislamu.
Kwa msingi huo, kumfahamu Hazrat Fatima Zahra (SA) na kujifunza mwenendo wake ni sehemu muhimu ya kuifahamu vizuri familia ya Mtume (saww) na mafundisho ya Ahlul-Bayt (as).
Mwandishi wa makala asili: Firouzeh Deldari, mtafiti na mwanaharakati wa vyombo vya habari na mitandao ya kijamii.
Maoni yako