Irada ya Mwanadamu; Ufunguzi wa Mafanikio na Furaha katika Mafundisho ya Qur’ani na Hadithi

Shirika la Habari la Kimataifa la Ahlul-Bayt (as) -ABNA- Irada ni kipengele cha msingi katika safari ya maisha ya mwanadamu. Qur’ani Tukufu na riwaya za Ahlul-Bayt (a.s.) zimeitambulisha iradha kama chombo cha kuchagua na kipengele kinachomtofautisha mwanadamu na viumbe wengine. Wataalamu wa Kiislamu wa kisasa pia wameeleza umuhimu wa irada katika kuunda hatima ya mtu, kufikia mafanikio binafsi na kuinua jamii kwa ujumla.

Mtazamo wa Qur’an kuhusu Irada

Taarifa kutoka Shirika la Habari la Ahlul-Bayt (a.s.) – ABNA:
Qur’ani Tukufu inamueleza mwanadamu kuwa kiumbe mwenye uhuru wa kuchagua na mwenye kuwajibika:
“Hakika Mwenyezi Mungu habadilishi yaliyoko kwa watu mpaka wabadilishe yaliyoko katika nafsi zao.” (Sura ya Ra’d, aya 11)

Aya hii tukufu inaonyesha kuwa mabadiliko ya kweli katika maisha ya mwanadamu hutokea tu kupitia irada na juhudi zake binafsi; hakuna mabadiliko yoyote yatakayoweza kutokea bila utashi na hatua za mtu mwenyewe. Qur’ani pia katika aya nyingine inasisitiza dhamira na jukumu la mtu binafsi:
“Basi atakayeongoka, hujiongozea nafsi yake.”

Mtazamo wa Ahlul-Bayt (a.s.) kuhusu Irada

Imam Ali (a.s.) amesema katika Nahjul-Balagha:
“Mwenyezi Mungu humsaidia yule anayependa kusaidiwa, na yeyote anayetaka kupata mema, Mwenyezi Mungu humwongoza kwenye njia ya kheri na ustawi.”

Nafasi ya Irada katika Maisha ya Kila Mtu na Jamii

Hujjatul-Islam wal-Muslimin Muhammad Reza Hakimi anaeleza:
“Irada ni nguvu ya ndani ya mwanadamu ambayo haielekezi tu maendeleo ya mtu binafsi, bali pia huathiri jamii nzima. Udhaifu wa iradha husababisha kusita na kutotenda, ilhali nguvu ya iradha huwa chimbuko la harakati zenye kujenga.”

Misingi Mitatu ya Kuimarisha Irada

1. Uelewa wa nafsi: Kutambua uwezo na mipaka yako binafsi.
2. Mazoezi ya vitendo: Kuanza kutekeleza maamuzi madogo na kushikamana nayo.
3. Kujihusisha na maadili ya Kiungu: Kumkumbuka Mwenyezi Mungu, kuelekeza malengo kwa upande wa kiroho, na kutenda mema.

Njia za Kivitendo za Kuimarisha Irada

1_Kumkumbuka Mwenyezi Mungu: Swala, dua na tafakuri juu ya Mwenyezi Mungu huimarisha nguvu ya iradha.

2_Kujidhibiti: Kujenga nafsi na kuzuia matamanio ya nafsi hupelekea maamuzi sahihi.

3_Mazoezi ya kufanya maamuzi: Kuanza na mambo madogo, kisha hatua kwa hatua kufanya maamuzi makubwa.

4_Kujifunza kutoka kwa Ahlul-Bayt (a.s): Kusoma mwenendo na maadili yao ni mfano bora wa kuimarisha iradha.

Mwisho:

Irada ni daraja linalounganisha uchaguzi wa mtu na hatima yake; ni jambo ambalo Qur’ani, hadithi na wanazuoni wakubwa wa Kiislamu wamelipa kipaumbele.
Mwanadamu anapofanya juhudi ya kujenga na kuimarisha iradha yake, anaweza kufikia furaha, ukamilifu, na mafanikio, akashinda changamoto za maisha na kuwa mchezaji hai katika maisha yake na jamii.